رايحه فين ... يابلد ؟

رايحه فين ... يابلد ؟
شايله قفه فوق دماغك
وماسكه فى ايدك ولد

؟ ؟

قالت البلد :
رايحه أطفش من البلد
الشر فيها اتولد
قفتى فيها التاريخ
هحافظ عليه م التلف
خايفه من ابن اللئيم
يزرع دسيسه فى القيم
وكفايه يا أبنى اللى انزرع

واخده معايا ابن الشهيد
اللى ابوه مات قتيل
هعلمه كل التاريخ
من غير دسيسه أو خدع
هعلمه ازاى يحافظ ع القيم
ويوم مايرجع ... هيبقى سيف
وأسمه هيبقى ... صرخة امل

قالت البلد :
رايحه
اكتب على جدار الزمن
حكاية بلد له تاريخ واتهدم
رايحه احكى
عن عرض الصبيه
يوم ماأغتصب

رايحه احكى
ع الشباب اللى اتسحل
ع الزرع
اللى مات م العطش

ع الانهار
اللى صارت برك
ومات فيها ...... حتى السمك
الف خساره ياشعب ضايع
يمكن فى يوم ييجى الامل

قالت البلد :
رايحه أعيش بين الجبال
عن عيونكم راح أختفى
اسكن وسط الوحوش
يمكن هناك الاقى وطن

مشت البلد
سابتنى فى نص الطريق
مشت البلد
سابتنى انده واقول :
ارجعى لينا يااااااااااابلد

مشت البلد
وهى ماسكه فى أيدها الولد
تعالوا نبحث ع البلد
من غيرها ازاى نعيش .. ؟
هيه كل الامان
هيه الاصل واحنا عدم
تعالوا نجيبها قوام
نجيبها هيه والولد

راحت
تسكن وسط الجبال
راحت
تعيش عند الوحوش
خايفة
عليها وع الولد